దేవుడు నిన్ను చల్లగా చూడాలి.. భారతీయుడి మంచితనానికి కన్నీళ్లు పెట్టుకున్న అమెరికన్ జంట.. వీడియో ఇదిగో!

నిరాశ్రయులైన ఓ అమెరికన్ జంటకు భార‌తీయ యువ‌కుడు ఆహారం, నీళ్లు అందించి వారి ఆకలి తీర్చిన ఘటన అందరి హృదయాలను కదిలిస్తోంది. నోవా అనే ఇన్‌స్టాగ్రామ్ క్రియేటర్ చేసిన ఈ సాయంపై నెటిజన్ల నుంచి ప్రశంసల వర్షం కురుస్తోంది.

కొత్త సంవత్సరం రోజున నోవాకు రోడ్డు పక్కన నిస్సహాయ స్థితిలో ఓ జంట కనిపించింది. వారి వద్దకు వెళ్లి, ముందుగా కొన్ని వాటర్ బాటిళ్లు అందించాడు. ఇంకా ఏమైనా కావాలా? అని అడగగా, ఆ జంటలోని వ్యక్తి ఎంతో వినయంగా "మెక్‌డొనాల్డ్స్‌లో ఏదైనా తింటాం" అని కోరాడు. వెంటనే నోవా వారి ఆర్డర్ తీసుకుని, వారికి ఆహారం తెచ్చి ఇచ్చాడు. ఊహించని ఈ సాయానికి ఆ జంట తీవ్ర భావోద్వేగానికి గురైంది. వారు పదేపదే కృతజ్ఞతలు తెలుపుతూ, "దేవుడు నిన్ను చల్లగా చూడాలి (గాడ్ బ్లెస్ యూ)" అని దీవించారు.

ఈ వీడియోను నోవా సోషల్ మీడియాలో పోస్ట్ చేస్తూ, "వీరి వద్ద తాగడానికి నీళ్లు కూడా లేకపోవడం చూసి కన్నీళ్లొచ్చాయి. వారికి సాయం చేయగలగడం నా అదృష్టం" అని క్యాప్షన్ పెట్టాడు. ఈ వీడియో చూసిన నెటిజన్లు నోవా మంచితనాన్ని కొనియాడుతున్నారు. "డబ్బు ఇస్తే డ్రగ్స్‌కు వాడొచ్చు, కానీ ఆహారం ఇవ్వడం ఉత్తమమైన పని" అని ఒకరు, "ప్రతిచోటా మీలాంటి వారుంటే బాగుండును" అని మరొకరు కామెంట్ చేశారు.

నోవా ఇలా సాయం చేయడం ఇది మొదటిసారి కాదు. గతంలో భారీ వర్షంలో చిక్కుకుపోయిన పక్షవాతం రోగి అయిన ఓ మహిళను తన కారులో ఎక్కించుకుని, సురక్షితంగా ఆమె కుమార్తె ఇంటి వద్ద దింపిన వీడియో కూడా వైరల్ అయింది.